ວັນທີ 14 ຕຸລາ 2024 ນີ້; ແຂວງເຊກອງໄດ້ຈັດພິທີປະກາດການຍົກຍ້າຍ,ແຕ່ງຕັ້ງພະນັກງານນຳພາ ແລະ ຄຸ້ມຄອງ ຂື້ນຢ່າງເປັນທາງການ ທີ່ສະໂມສອນຂອງຫ້ອງວາການປົກຄອງແຂວງ ໂດຍການເປັນປະທານຂອງທ່ານ ເຫຼັກໄຫຼ ສີວິໄລ ເລຂາພັກແຂວງເຈົ້າແຂວງໆເຊກອງ, ມີຫົວໜ້າພະແນກ-ຮອງພະແນກ, ພ້ອມດ້ວຍພະນັກງານລັດຖະກອນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີທ່ານ ນາງ ເພັດດາວອນ ວາດສະຫງ່າ ຮອງຫົວໜ້າຄະນະຈັດຕັ້ງແຂວງໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການອະນຸມັດແຕ່ງຕັ້ງພະນັກງານລັດຖະກອນຍົກຍ້າຍໄປປະຈຳການບ່ອນໃໝ່; ເຊິ່ງມີ 4 ພາກສ່ວນຄື: ສະຫະພັນນັກລົບເກົ່າ, ສະຫະພັນແມ່ຍິງ, ສະພາປະຊາຊົນແຂວງ ແລະ ລັດວິສາຫະກິດນໍ້າປະປາແຂວງ; ຕາມຂໍ້ຕົກລົງຂອງທ່ານເຈົ້າແຂວງ ສະບັບເລກທີ 21, 22, 23, 52, ແລະ 53 /ຈຂ,ຊກ ມີລາຍລະອຽດດັ່ງນີ້; ໄດ້ຕົກລົງແຕ່ງຕັ້ງທ່ານ ພົນຈັດຕະວາ ສົມທອງ ດອນກັນນ້ອຍ ເປັນປະທານສະຫະພັນນັກລົບເກົ່າແຂວງ, ທ່ານ ພົງສະຫວັດ ສິງຫາລາດ ສະມາຊິກປະຊາຊົນແຂວງ ໄປປະຈຳການຢູ່ອົງການປົກຄອງເມືອງທ່າແຕງ, , ທ່ານ ອິນພອນຮັກ ພັດສະຟອງ ເປັນອຳນວຍການລັດວິສາຫະກິດນໍ້າປະປາແຂວງ, ທ່ານ ນາງ ບົວລະພັນ ວົງເສດຖາ ເປັນຮອງປະທານສະຫະພັນແມ່ຍິງແຂວງ.
ໂອກາດນີ້ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງໄດ້ມີຄຳເຫັນໂອ້ລົມ; ໂດຍທ່ານໄດ້ເນັ້ນໃຫ້ບັນດາສະຫາຍທີ່ໄດ້ຮັບໃນການແຕ່ງຕັ້ງໃນຄັ້ງນີ້ຕ້ອງໄດ້ສຸມໃສ່ໃນການນໍາພາ-ຊີ້ນໍາ, ສຸມໃສ່ໃນດ້ານການສຶກສາອົບຮົມການເມືອງ-ນໍາພາແນວຄິດໃຫ້ແກ່ຖັນແຖວພະນັກງານ-ລັດຖະກອນມີຄວາມອຸ່ນອ່ຽງທຸ່ນທ່ຽງໃນການປະຕິບັດໜ້າທີ່ວຽກງານການເມືອງ, ວິຊາສະເພາະຂອງຕົນດ້ວຍຄວາມຮັບຜິດຊອບສູງ ພ້ອມທັງໃຫ້ເອົາໃຈໃສ່ຕິດຕາມກວດກາວຽກງານຕ່າງໆທີ່ຂັ້ນເທິງກໍຄື ພັກ-ລັດ ມອບໝາຍໃຫ້ຢ່າງມີປະສິດທິພາບ ແລະປະສິດທິຜົນດີຂຶ້ນເລື້ອຍໆ.

ກອງປະຊຸມໃຫຍ່ສະມາຊິກພັກ ຄັ້ງທີ IX ໜ່ວຍພັກຫ້ອງການ ພະແນກສຶກສາທິການ ແລະ ກິລາແຂວງເຊກອງ (ໜ່ວຍທີ I) ໄຂຂຶ້ນໃນວັນທີ 20 ກັນຍາ 2024 ນີ້, ໂດຍການເປັນປະທານຂອງ ສະຫາຍ ຄຳໄພ ສິມມາວັດ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກສຶກສາທິການ ແລະ ກິລາແຂວງ, ມີສະຫາຍ ນາງ ເພັດດາວອນ ວາດສະຫງ່າ ຮອງຫົວໜ້າຄະນະຈັດຕັ້ງແຂວງ, ບັນດາສະຫາຍໃນຄະນະພັກຮາກຖານ, ຄະນະໜ່ວຍພັກ, ຂະແໜງການກ່ຽວຂ້ອງ ແລະ ສະມາຊິກພັກພາຍໃນໜ່ວຍ ເຂົ້າຮ່ວມ.
ສະຫາຍ ມະໄລເພັດ ມາດມະນີວົງ ເລຂາໜ່ວຍພັກຫ້ອງການ ພະແນກສຶກສາທິການ ແລະ ກິລາແຂວງ ໄດ້ລາຍງານວ່າ: ໜ່ວຍພັກຫ້ອງການ ແມ່ນໜ່ວຍພັກໜຶ່ງທີ່ຂຶ້ນກັບການນໍາພາ-ຊີ້ນໍາ ຂອງຄະນະພັກຮາກຖານ ພະແນກສຶກສາທິການ ແລະ ກິລາແຂວງ, ມີ 3 ຂະແໜງທີ່ຂຶ້ນກັບ ຄື: ຂະແໜງບໍລິຫານ-ການເງິນ, ຂະແໜງພັດທະນາຄູ ແລະ ຂະແໜງຈັດຕັ້ງ-ພະນັກງານ, ມີຄະນະໜ່ວຍພັກ 3 ສະຫາຍ, ຍິງ 1 ສະຫາຍ, ມີສະມາຊິກພັກທັງໝົດ 23 ສະຫາຍ, ຍິງ 7 ສະຫາຍ ໄດ້ແບ່ງເປັນ 3 ຈຸດໍາເນີນຊີວິດການເມືອງ. ໃນໄລຍະຜ່ານມາ, ຄະນະໜ່ວຍພັກໄດ້ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດ ໃຫ້ສະມາຊິກພັກ, ພະນັກງານ-ລັດຖະກອນທີ່ຢູ່ໃນຄວາມຮັບຜິດຊອບຂອງຕົນ ຮັບຮູ້-ເຂົ້າໃຈ ແລະ ກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍ ແລະ ແຜນພັດທະນາເສດຖະກິດ-ສັງຄົມ ກໍຄືແຜນພັດວຽກງານການສຶກສາຂອງລັດວາງອອກແຕ່ລະໄລຍະ; ເອົາໃຈໃສ່ປັບປຸງການຈັດຕັ້ງ, ແບບແຜນນໍາພາ-ວິທີເຮັດວຽກຂອງພັກ-ລັດໃຫ້ເຂັ້ມແຂງ, ເຮັດໜ້າທີ່ເປັນເສນາທິການໃຫ້ຄະນະພັກ, ຄະນະພະແນກ ໃນການສ້າງແຜນກຳນົດພະນັກງານ, ເລືອກເຟັ້ນ ແລະ ບັນຈຸຊັບຊ້ອນພະນັກງານໃສ່ຕຳແໜ່ງງານຕ່າງໆຂອງລັດຢ່າງເໝາະສົມ ແລະ ສອດກັບນິຕິກໍາຕ່າງໆ ທີ່ຂັ້ນເທິງວາງອອກ; ເອົາໃຈໃສ່ກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຕິດພັນກັບການຂະຫຍາຍພັກ ແລະ ກໍ່ສ້າງພະນັກງານ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານຕົວຈິງໃນໄລຍະໃໝ່. ໃນນີ້, ຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ 8 ສະຫາຍ, ຍິງ 4 ສະຫາຍ, ເລື່ອນສະມາຊິກພັກສະໄໝສຳຮອງຂຶ້ນສົມບູນ 6 ສະຫາຍ, ຍິງ 3 ສະຫາຍ, ຈັດສົ່ງພະນັກງານໄປຍົກລະດັບດ້ານທິດສະດີ, ຍົກລະດັບວິຊາສະເພາະຊັ້ນປະລິນຍາໂທ, ປະລິນຍາຕີ, ຝຶກອົບຮົມໄລຍະສັ້ນ ແລະ ປະຕິບັດນະໂຍບາຍອື່ນໆຢ່າງເໝາະສົມ.